Louzán dí sobre a Lei mordaza que "as Administracións teñen que seguir sendo permisivas"
Por Oskar Viéitez
O presidente da Deputación de Pontevedra e do Partido Popular provincial, Rafael Louzán, referiuse este venres á recentemente aprobada Lei Orgánica de Seguridade Cidadá asegurando que "as administracións teñen que seguir sendo permisivas".
Na tradicional rolda de prensa trala xunta de goberno da Deputación, Louzán foi preguntado por esta lei que acaba de aprobar o PP en solitario fronte a todos os demais grupos parlamentarios que a consideran unha "lei mordaza" ao entender que limita dereitos fundamentais.
"Aquí somos receptivos a todo aquilo que defenda un interese colectivo ou un interese xeral", dixo Louzán. "Creo que as administracións teñen que seguir sendo permisivas", engadiu.
O mandatario popular entende que a lei o que pretende é unha regulación "para que non se causen problemas a outras persoas que non teñen nada que ver coa reclamación que está en marcha".
A Deputación de Pontevedra converteuse en "caixa de resonancia"
Neste sentido interpreta que, na parte que lle afecta, a Deputación de Pontevedra converteuse en "caixa de resonancia" para moitos dos problemas xurdidos nos últimos anos "e en todos eles houbo boa disposición, absoluta colaboración e boa acollida por parte non só do goberno provincial senón de toda a corporación", afirmou.
Louzán indicou que a institución provincial foi "un modelo" e avanzou que "independientemente de cal sexa a regulación que agora a lei implica, non imos deixar de ser permisivos e colaboradores" fronte a calquera problema, xa que, dixo "somos unha institución que está para defender os intereses de toda a sociedade e creo que escoitar a todos os colectivos é a nosa misión e a de todas as administracións".
PORTAL TRANSPARENCIA
Rafael Louzán tamén se referiu ao novo portal sobre a transparencia, chanceando co tema dos soldos: "xa vin que eu estaba un pouco por baixo do presidente da Xunta co cal xa tranquiliceime porque senón sería obxecto dalgunha mala interpretación".
O dirixente popular recordou que no ano 2003 ao chegar á presidencia da Deputación mantivo a mesma retribución que tiña o seu antecesor, Manuel Abeledo, quen xa a principios de mandato rebaixara as súas percepcións tras unha suxestión respecto diso do ex presidente do PP de Galicia, Xosé Cuíña.
En xuño do ano 2010 o Pleno provincial da Deputación de Pontevedra aprobou unha rebaixa dos soldos das principais figuras do equipo de goberno, entre un 10 e un 9%, entre elas a do propio presidente da institución.
Louzán concluíu apuntando que non é "entendible" o soldo que percibe o presidente do Goberno, Mariano Rajoy, pero non subirse esa cantidade é unha decisión "que o honra" sobre todo "pensando no que está sufrindo algunha xente neste país".