Detida por finxir un roubo na súa vivenda mediante o "método do esvarón"
Por Oskar Viéitez
Axentes da Policía Nacional imputaron unha muller de 40 anos de idade, veciña de Pontevedra, como presunta autora dun delito de simulación de infracción penal.
Segundo informan dende a Comisaría de Pontevedra os feitos sucederon o día 23 de outubro, cando a agora imputada denunciaba nestas dependencias ter sido vítima dun roubo con forza no interior da súa vivenda mediante o "método do esvarón" que consiste abrir o ferrollo da porta empregando unha pequena placa plástica, a cal se introduce entre o marco da porta e o fecho.
Segundo relatou na súa denuncia, cando volveu á casa se encontrou a porta de acceso á vivenda entornada e notou a falta dun sobre con 300 euros, que retirara no caixeiro da súa entidade bancaria e que deixara enriba da mesa do salón, ademais de dous aneis de ouro que se encontraban enriba de dito sobre.
Tras efectuar a inspección ocular na vivenda os axentes comprobaron que non había rastros ou evidencias da entrada á vivenda utilizando o método denunciado.
Unha vez citada novamente na Comisaría a muller incorreu en numerosas contradicións, ademais cando os axentes lle preguntaron se xa fora resarcida economicamente por parte da aseguradora contratada contestou con evasivas.
Os axentes comprobaron que a aseguradora xa aboara en conta e cobrara a denunciante un total de 898,85 euros.
Por todo iso a muller foi informada dos seus dereitos como imputada non detida e da obriga de comparecer ante a Autoridade Xudicial cando para iso fose requirida.