Precintan La Tienda de Clara en Campolongo por problemas coa súa insonorización
Por Redacción
Os clientes habituais de La Tienda de Clara en Campolongo leváronse nos últimos días unha sorpresa desagradable. As súas portas están pechadas por orde municipal. O establecemento foi precintado por problemas coa súa insonorización, segundo confirman dende o Concello de Pontevedra.
O precinto, que chega tras unha resolución da Alcaldía asinada o pasado 22 de setembro, é consecuencia dun expediente aberto polo servizo de Disciplina Urbanística.
Todo parte, segundo o goberno municipal, dunha serie de denuncias veciñais polos ruídos que xeraba o local coa súa actividade. Os técnicos comprobaron que o establecemento non estaba debidamente insonorizado e instouse en varias ocasións os propietarios a presentar un proxecto para acondicionar o local e proceder á súa insonorización.
Non obstante, en ningún momento se presentou o devandito proxecto polo que, esgotados os prazos de tramitación, procedeuse ao seu precinto. No caso contrario, os responsables políticos poderían ter incorrido nun delito de prevaricación.
En todo caso, o precinto manterase mentres os donos do local non presenten o devandito proxecto e se faga a correspondente obra. Se solucionan estas deficiencias poderán volver abrir as súas portas sen ningún problema.