As estradas pontevedresas convértense en pistas de patinaxe
Por Oskar Viéitez
Este domingo coincidiron unha morea de accidentes de tráfico nas estradas pontevedresas, na maioría de casos tratáronse de saídas de vía pola perda do control do vehículo por parte dos condutores implicados. Afortunadamente non se rexistraron feridos de consideración. Estes son algúns dos sucesos de maior importancia:
- O Centro de Atención de Emerxencias 112 Galicia, informou dunha colisión frontolateral entre dous vehículos, un Seat Ibiza e un Opel Astra, producida ás 18.19 horas no quilómetro 74,5 da N-541, entre Pontevedra e Ourense, no termo municipal de Cotobade. Os condutores de ambos os dous vehículos, un mozo e unha sesaxenaria, tiveron que ser excarcerados polos Bombeiros de Pontevedra. Os feridos foron trasladodos a un centro hospitalrio da capital.
- O 112 tamén deu conta doutro sinistro acontecido ás 16.18 horas en Vilaboa, na estrada N-554. Un condutor sufriu unha saída de vía despois de que o seu vehículo fixese 'acuaplanning' como consecuencia dunha bolsa de auga acumulada na calzada. Non houbo feridos.
- Os efectivos de Protección Civil informaron dun accidente ás 18.03 horas do domingo na PO-308, a estrada que discorre pola costa comunicando Pontevedra e Sanxenxo. Neste último termo municipal, á altura de Areas. De novo unha saída de vía protagonizada polo condutor dun Seat León.
- En Pontevedra ás 18.07, informouse doutra saída de vía dun vehículo na PO-225, na parroquia de Alba, con varios feridos de carácter leve.
- Ademais Protección Civil de Vilanova informou dun accidente acontecido este domingo sobre as 11.00 horas no barrio das Sinas. Tratouse dunha saída de vía dun turismo Audi A3, cuxo condutor, por causas que se descoñecen, perdeu o control do vehículo colisionar contra outro coche para rematar encaixándose contra o portal dun garaxe. Ningún dos implicados no accidente precisou de atención médica.
- Finalmente o Protección Civil de Barro informou do suceso protagonizado por unha muller duns 30 anos de idade que permaneceu máis dunha hora no fondo dun terraplén duns 15 metros de profundidade tras precipitarse co seu coche nunha saída de vía acontecida de madrugada na estrada de Vilagarcía, a PO-531, á altura de Curro, no municipio de Barro.