As chuvias continuarán ao longo da vindeira semana
Por Redacción
As chuvias teñen previsto manterse nas Rías Baixas ao longo dos próximos sete días, segundo as predicións de MeteoGalicia. Para este sábado 15 está previsto que non se rexistren cambios significativos ao encontrarse Galicia baixo a influencia dunha borrasca situada ao sur de Irlanda con aire frío nas capas altas da atmosfera.
Os ceos encontraranse con intervalos anubrados e chuvascos, con posibilidades de tormentas. As temperaturas non rexistrarán cambios significativos, situándose entre os 11 e os 16 graos, con vento soprando do oeste con intervalos fortes no litoral.
Durante o domingo manteranse os intervalos anubrados, con chuvascos, intermitentes pola mañá e máis ocasionais durante a tarde. As temperaturas continuarán sen cambios significativo.
Ao longo do luns 17, as altas presións localizadas entre Azores e a península Ibérica entrarán en Galicia deixando unha área atmosférica algo máis estable que a de xornadas anteriores. Durante a mañá haberá moitas nubes baixas e producirase algunha chuvia débil, con néboas no interior. Ao mediodía, as precipitacións tenderán a desaparecer e ir abríndose claros no ceo.
As xornadas do martes, mércores e xoves quedarán baixo a influencia das borrascas Atlánticas, despois da lixeira tregua que se espera para o luns. As probabilidades de chuvia volverán ser moi altas e tampouco se agardan cambios significativos nas Rías Baixas.