Os escolares pontevedreses aprenden a coidar a súa saúde a través da alimentación e o deporte
Por Redacción
Seis centros escolares de Pontevedra forman parte do ciclo 'Saúde, alimentación e actividade física' co que a concellaría de Educación quere adestrar os alumnos nos valores da vida saudable.
O concelleiro Agustín Fernández supervisou este mércores a xornada celebrada no colexio da Xunqueira 2, na que tamén participou Dani Hernández, xogador da Sociedad Deportiva Teucro.
O obxectivo é afastar os alumnos de Terceiro e Cuarto de Primaria da vida sedentaria e a alimentación inadecuada, como a comida rápida ou a bolería industrial.
Cada un dos ciclos formativos está formado por grupos de 25 alumnos, que participan nunha charla de 50 minutos con representantes do deporte local. Ademais a cada neno entrégaselle unha merenda saudable composta por unha peza de froita, un bocadillo, iogurt e auga.
Durante todo o mes de novembro os centros que participan na iniciativa son: Álvarez Limeses, San Bieito de Lérez, Parada (Campañó), San Martiño (Salcedo), Xunqueira 2 e A Carballeira (Lourizán).