Louzán afirma sentir "a mesma indignación e vergonza" que o resto da sociedade ante os casos de corrupción
Por Oskar Viéitez
Ante os casos de corrupción que se están a destapar nos últimos días o presidente provincial do Partido Popular, Rafael Louzán, asegurou sentir "a mesma indignación e vergonza que sinte toda a sociedade galega e española".
Louzán pediu o "máximo respeto" para a Xustiza e demandou "que todo se aclare de xeito rápido e que non se volvan a repetir situacións semellantes nunca máis".
O presidente provincial realizou estas declaracións este martes á saída do acto de presentación do novo restaurante do Museo de Pontevedra.
"A dignidade das persoas que estamos todos os días nesto tamén se ve afectada"
"A dignidade das persoas que estamos todos os días nesto tamén se ve afectada", comentou o presidente do PP de Pontevedra que entende que noticias como as relacionadas coa Operación Púnica provocan "desafección" e "dúbidas" que "te levan a pensar moito moito se vale a pena estar neste ámbito. Eu sinceramente creo que sí", confesou Rafael Louzán, convencido que hai que estar na política "para intentar axudar a facer cousas e dar o mellor de tí".
Neste sentido, Louzán rompeu unha lanza por aquelas persoas que, "de xeito honrado e comprometido co seu país e cos seus concidadáns, asumen responsabilidades políticas de xeito temporal".
"Quen entenda a política como unha profesión, está totalmente equivocado", proclamou o mandatario popular.
A preguntas dos xornalistas, Louzán destacou que, ante a proliferación de casos de corrupción se debería potenciar o labor de fiscalización e control dos funcionarios, ser máis rigoroso na aplicación das normas e lograr a plena transparencia nas institucións públicas.
"Onte foi un día triste para toda a sociedade e tamén para cantos temos, nun nivel ou outro, responsabilidades na vida pública", concluíu.