Investimentos de 875.000 euros para mellorar a parroquia de Lourizán
Por Redacción
Os traballos que se acometen na estrada de Marín e na praza de Valterra durante estes días completan unha suma de actuacións na parroquia de Lourizán cun investimento que ascende a 875.000 euros durante o último ano. Así o indicou o alcalde, Miguel Anxo Fernández Lores, durante a súa visita a esta zona do municipio, acompañado polo concelleiro delegado da parroquia, Demetrio Gómez.
Ao longo dos últimos meses abordáronse algunhas das obras máis demandadas polos veciños como a rehabilitación integral da estrada do Regueiriño, a mellora do cemiterio municipal da parroquia ou a rehabilitación do barrio dos Cunchidos.
Durante a visita, achegáronse á instalación do saneamento no lugar de Meán, o último núcleo de casas de Lourizán que quedaba por enganchar aos sumidoiros. O investimento superou os 170.000 euros. Desta forma, tamén se resolveu a canalización de augas pluviais do camposanto.
Dende o Concello indican que, seguramente, será necesario abordar unha terceira fase na estrada do Regueiriño onde xa se investiron 500.000 euros, cun proxecto que incluía o fresado da estrada, a reposición do firme e a canalización de todos os servizos.
No barrio dos Cunchidos elimináronse barreiras arquitectónicas e se realizaron obras para ennoblecer a estrema entre Pontevedra e Marín, coa intención de recuperar o carácter mariñeiro do barrio.
Na praza de Marqués de Valterra, por último, continúan os traballos de instalación de pasos de peóns elevados e de mellora das beirarrúas e de toda a iluminación pública, cun orzamento de 145.000 euros.