"Xuntos polo Nadal" ofrece prazas para maiores que pasen sós as festas
Por Redacción
A Área de Servizos Sociais do Concello de Vilagarcía informa da apertura do prazo de inscrición no programa "Xuntos polo Nadal" destinado ás persoas maiores que se atopen sós durante estas tradicionais festas e co obxectivo de que poidan gozar destas entrañables datas na compaña doutras persoas.
O programa consiste na estancia durante 11 días en réxime de aloxamento e pensión completa nunha residencia de tempo libre da Xunta. Os interesados deben presentar as solicitudes xunto coa documentación requirida ata o 15 de novembro. O trámite pódese facer nos Servizos Sociais do Concello, nos centros sociocomunitarios ou no Centro de Saúde.
O programa organizado pola Secretaría Xeral de Política Social da Xunta pretende evitar a situación de soidade na que se atopan moitas das persoas maiores, pola carencia de familiares, perda do seu cónxuxe ou a emancipación dos fillos. Estas circunstancias inciden con frecuencia en situacións depresivas que se poden evitar compartindo as festas con outras persoas.
"Xuntos polo Nadal" desenvolverase entre 23 de decembro de 2014 e o 2 de xaneiro de 2015 e os beneficiarios residentes na provincia de Pontevedra aloxaranse nas residencias de tempo libre do Carballiño.
O programa contempla o aloxamento, en habitacións compartidas e manutención en réxime de pensión completa, durante 11 días (10 noites) que se computarán desde o momento de saída do lugar de orixe ata o momento da saída do centro no que se leva a cabo. A saída desde os puntos de orixe (Santiago, A Coruña, Ferrol, Pontevedra, Vigo, Lugo e Ourense) realizarase o día 23 de decembro pola mañá e o regreso o día 2 de xaneiro de despois do xantar.