Cortes de tráfico durante a mañá do domingo por causa do Medio Maratón
Por Redacción
A disputa do XIX Medio Maratón de Pontevedra o próximo domingo 19 de outubro ocasionará cortes de tráfico ao longo da cidade durante toda a mañá.
Dende as 10:00 horas, unha antes do comezo da proba, prohibirase a circulación rodada en todo o circuíto, aínda que si se permitirá o aparcadoiro a excepción das rúas Padre Gaite e Igrexas Vilarelle (dende o sábado ás 22:00 horas), pero sen poder mover o coche ata o final de carreira, previsto para as 13:30 horas.
Antes, dende as 7:00 horas, pecharase o carril de saída da ponte dos Tirantes para instalar o punto de saída do medio maratón. A chegada pola súa banda será na pista de ateltismo do Centro Galego de Tecnificación Deportiva.
Ademais o novo percorrido, con maior presenza do casco histórico, deixará inaccesible unha zona da cidade delimitada por un perímetro entre Arcebispo Malvar, Riestra, Rúa Real e Avenida de Bos Aires, habilitándose un só punto de saída pola Praza de España cara Alameda.
A proba afectará tamén aos veciños de Monte Porreiro ao cortar o acceso ao barrio polo río, e tamén provocará o peche total das pontes do Burgo e Tirantes, quedando como saída cara ao norte a ponte da Barca ou a AP-9.
O circuíto completo constará de dúas voltas polas seguintes rúas: ponte dos Tirantes, Avenida de Bos Aires, Valentín García Escudero, Real, Curros Enríquez, Soportais, Odriozola, Peregrina, Andrés Muruáis, Andrés Mellado, Peregrina, San Pedro Alcántara, Alcalde Hevia, Iglesias Vilarelle, Paseo do Gafos, Xeneral Rubín, Augusto García Sánchez, Praza de Galicia, Augusto González Besada, Marqués de Riestra, Praza de España, Arzebispo Malvar, Travesía de Galera, Avenida de Uruguai, ponte das Correntes, Avenida de Uruguai, Rotonda de San Roque, Avenida de Uruguai, ponte das Correntes, Bos Aires, ponte de Santiago, Fernández Cochón, Alexandre Bóveda, Tirantes, Bos Aires, praia fluvial, Bos Aires, ponte dos Tirantes e inicio da segunda volta que concluirá por Padre Gaite e Fernando Olmedo ata o CGTD.
No dispositivo especial de tráfico participarán axentes da Policía Local e voluntarios de Protección Civil.