Aos veciños e comerciantes de Santa Clara esgotóuselles a paciencia ante a paralización e o atraso das obras de reforma da rúa.

Este xoves convocaron os medios de comunicación para trasladar o seu malestar e lamentar a falta de resposta municipal ás súas queixas tras solicitar unha reunión co concelleiro de urbanismo, Antón Louro. A entrevista foi pedida a través de AEMPE o pasado día 8 de setembro "e non tivo a ben de contestar", criticaron.

Estes residentes asumen que calquera obra leva consigo unha serie de molestias pero reprochan o "incumplimeinto sistemático" das previsións iniciais, que apuntaban a nove ou dez meses de duración dos traballos dende que estes arrancaron en setembro de 2013. A día de hoxe a obra esta paralizada, pendente da realización dun estudo arqueolóxico tras descubrirse unhas lousas que poderían pertencer ao antigo Camiño de Castela.

Entre outros prexuízos o voceiro Sebastián Filgueira enumerou que "os veciños non poden entrar nas súas vivendas nin os clientes nas tendas coa lóxica perda de vendas". "Estamos en anos malos, xa perdemos a campaña de verán, que polo menos poidamos salvar a de Nadal", lamentou.

Outra das voceiras, Begoña Vázquez, indicou que as chuvias destes días volveron provocar inundacións en dous garaxes da zona. Entre outros obxectivos a obra ten previsto separar a canalización de augas pluviais e fecais.

Sinalan que "ademáis hai un problema grave de suciedade", empeorado coas chuvias que converteron a calzada nunha lameira chea de fochas.

Outra denuncia é a falta de sinalización vial que "provoca que os condutores non saiban a dirección da rúa e se circule nas dúas direccións".

Na parte xa reformada, ao existir unha plataforma única que non delimita a beirarrúa e a calzada "os coches aparcan ante as portas dos comercios ou das casas pasando por enriba da beirarrúa", ou mesmo multas por parte da Policía Local por colocar macetas á entrada das tendas.

Estes afectados esperan unha pronta solución as súas queixas.