Unha banda organizada desvalixa a tenda outlet de Piñeiro Sport en Vilagarcía
Por Oskar Viéitez
A tenda outlet de Piñeiro Sport en Vilagarcía, situada en Rubiáns, foi vítima dun roubo. O suceso tivo lugar a pasada madrugada.
Segundo explicou o propietario do establecemento, Fernando Piñeiro, os cacos entraron na nave tras abrir un burato polo conduto do aire acondicionado do teito. Logo baixaron polos estantes e unha vez no interior do establecemento anularon a alarma.
"Debieron estar trabajando durante varias horas porque se llevaron gran cantidad de ropa y calzado deportivo", explicou o propietario.
Para transportar a mercadoría roubada os asaltantes empregaron unha furgoneta, cuxas rodas deixaron marcas na parte traseira da nave, duns 1.500 metros cadrados.
A primeira hora da mañá deste luns tívose noticia do roubo cando o encargado de Piñeiro Sport acudiu ao seu traballo para abrir o establecemento ao público.
Os ladróns deixaron as caixas de calzado tiradas nas inmediacións da nave de Rubiáns para poder meter máis zapatillas no seu vehículo.
"Este robo supone para nosotros un golpe durísimo, ya que todavía no nos habíamos recuperado del anterior robo sufrido el pasado mes de febrero", lamentou Fernando Piñeiro.
A Policía Nacional cre que os autores forman parte dunha banda organizada itinerante.