Cinco feridos en tres accidentes de tráfico en Sanxenxo e Cambados
Por Oskar Viéitez
A Policía Local de Cambados informou dun accidente de tráfico acontecido este venres ás 19,50 horas, no paso de peóns da rúa O Pombal.
Segundo explicaron estas fontes, un Opel Zafira golpeou con forza por detrás a un BMW que ao desprazarse colidiu contra unha moto. O motorista caeu sobre dúas persoas maiores que cruzaban o paso de peóns.
Catro dos implicados neste suceso tiveron que ser trasladados en ambulancia ata un centro hostpitalario, entre eles os dous peóns de avanzada idade.
SANXENXO
Protección Civil de Cambados informou dunha saída de vía dun vehículo que circulaba ás 15:30 horas pola Autovía do Salnés. Á altura de Nantes, en dirección a Pontevedra, o turismo saíuse da vía provocando o xiro do remolque.
Finalmente informou o Centro de Atención de Emerxencias 112 doutro suceso acontecido en Sanxenxo ás 17:40 horas, un motorista necesitou asistencia médica tras resultar ferido en Adina ao cruzárselle un can na estrada.