Localizan unha plantación de marihuana nun invernadoiro de Verducido e deteñen o dono
Por Redacción
Un veciño de Pontevedra de 19 anos foi identificado e imputado pola Policía Local como presunto propietario dunha plantación de marihuana localizada na parroquia de Verducido. Tiña oito plantas que, unha vez extraidas polos axentes, botaron un peso de 8,5 quilos.
Unha patrulla da Policía Local de Pontevedra descubriu a plantación no lugar de Bordel. Aconteceu sobre as 15.30 horas do 26 de agosto e os axentes observaron un pequeno invernadoiro que se vía dende a estrada e do que saían varias plantas de marihuana.
Os axentes comezaron a realizar pescudas para localizar o propietario das plantas e dous días despois, o 28 de agosto, sobre as 19.30 horas, unha patrulla observou como un mozo accedía ao terreo e realizaba tarefas vinculadas co coidado das plantas.
Os axentes identificárono e resultou ser un veciño de Pontevedra de 19 anos. O rapaz recoñeceu ser o dono da plantación e a Policía Local imputoulle por un presunto delito contra a saúde pública por plantación de marihuana.