Os escritores Alfredo Conde e Antonio Castro recibirán as Cebolas de Ouro 2014
Por Redacción
O próximo xoves, día 4 de setembro, a Praza dos Barcos de Sanxenxo acollerá o acto de entrega das Cebolas de Ouro 2014, dentro da programación da XXXII Feira da Cebola.
As distincións recaeron este ano en dous escritores, o local Antonio Castro e o ourensán Alfredo Conde.
No primeiro dos casos a alcaldesa, Catalina González, destacou como razón fundamental para outorgar o galardón "a paixón que sinte por Sanxenxo que se reflicte especialmente na homenaxe que rende no seu libro Lilainas ás mulleres desta vila poñéndoas no lugar que merecen".
Por outra parte Alfredo Conde é un "veraneante ilustre desta vila á que nomea sempre cun agarimo tal que nos fai sentir orgullosos de que Sanxenxo estea ligado aos seus recordos e vivencias", defendeu a rexedora.
As Cebolas de Ouro entregaranse coincidindo co día da patroa, Santa Rosalía.