Marín imporá sancións de 300 euros aos propietarios que non limpen a maleza das súas leiras
Por Redacción
O Concello de Marín poñerá en marcha unha campaña de control de leiras urbanas e rurais para abrir expedientes aos particulares que, incumprindo a normativa vixente, permiten que os seus predios sexan invadidos pola maleza. Segundo denuncian dende o goberno local, en case todos os casos esa maleza remata invadindo as beirarrúas ou os camiños. Alertan, ademais, de que en moitos casos se aprecian árbores preto de vivendas ou en mal estado ante os que hai que actuar.
Segundo afirman dende o Concello de Marín, prodúcense numerosas denuncias e adoitan coincidir sobre as mesmas propiedades.
A multa mínima que impón o Concello en caso de que se tramite o expediente sancionador por esta situación é de 300 euros, aínda que case todos os particulares, segundo o goberno local, realizan as tarefas de limpeza ao recibir a notificación na que se lles avisa da posible sanción económica.
Ao longo da semana realizarase a campaña de comprobación do estado das propiedades a raíz das queixas veciñais tanto no rural como no centro de Marín e en zonas concretas como a avenida de Ourense.