Un axente fóra de servizo impide un roubo na rúa Pasantería
Por Redacción
Axentes da Comisaría Provincial de Pontevedra da Policía Nacional procederon este domingo á detención dun home, veciño de Pontevedra, como presunto autor dun roubo con violencia.
Os feitos tiveron lugar sobre as 21:20 horas na rúa Pasantería, na cidade de Lérez, cando un axente fóra de servizo observou o forcexo entre un home e unha parella, tras intentar o primeiro subtraer o bolso da señora polo método do 'tirón' dende unha bicicleta.
O axente procedeu a reter o presunto autor do roubo, de 52 anos, ata a chegada dunha dotación da Policía Nacional.
O home foi detido e trasladado a dependencias policiais para tramitar o correspondente atestado policial antes de pasar a disposición do Xulgado de Garda de Pontevedra.