Investigan unha agresión con arma branca de madrugada en Vilagarcía
Por Redacción
Axentes da Comisaría do Corpo Nacional de Policía de Vilagarcía de Arousa abriron unha investigación para aclarar unha agresión con arma branca rexistrada sobre as 3.00 horas da pasada madrugada no centro desta localidade.
Fontes policiais confirmaron que unha persoa resultou ferida na agresión e presenta un corte producido cunha arma branca, pero, en principio, encóntrase fóra de perigo e mesmo podería recibir a alta hospitalaria nas próximas horas.
A agresión produciuse na avenida Rosalía de Castro coincidindo coas celebracións da noite previa á Festa da Auga e o ferido, veciño de Vilagarcía, tivo que ser atendido no lugar por unha ambulancia do 061 e posteriormente trasladado ao hospital.
A mediodía deste sábado aínda non se producira ningunha detención en relación con estes feitos. Os axentes que se fixeron cargo da investigación non localizaron o suposto agresor e, de feito, non se descarta que poida haber máis dunha persoa implicada no incidente.
Tras darse a alerta do sucedido desprazáronse ao lugar axentes das policías Local e Nacional, así como o 061. Nos primeiros momentos falábase dun apuñalamento, pero, ata o momento, os investigadores só confirman que houbo unha agresión con arma branca, sen detallar como se produciu esta.