Evacúan en helicóptero un motorista ferido na colisión cunha furgoneta en Cambados
Por Redacción
Creada e actualizada
Creada e actualizada
Unha persoa tivo que ser trasladada en helicóptero ao Hospital Clínico Universitario de Santiago de Compostela tras resultar ferida nun accidente na zona de Tragove, en Cambados.
O Centro de Atención de Emerxencias de Galicia 112 recibiu unha alerta ás 11.52 horas de que unha persoa resultara ferida despois de chocar un coche e unha moto que circulaban pola avenida da Pastora, en Tragove. Segundo ten informado Protección Civil de Cambados, na colisión víronse implicados unha furgoneta conducida por unha muller de 57 anos que resultou ilesa e unha moto conducida por un mozo de 31 que resultou ferido.
Debido á gravidade das lesións, requiriuse a presenza do helicóptero medicalizado con base en Santiago de Compostela, que tomou terra pola parte de atrás do Porto de Tragove, a uns metros do lugar do sinistro e trasladou ao ferido ata o Hospital Clínico. Segundo Urxencias Médicas de Galicia, trátase dun home de 31 anos que responde ás iniciais O.F.G. Presentaba unha fractura aberta no nocello esquerdo.
Tras recibir a alerta, o 112 pediu a colaboración dos axentes da Policía Local e dos efectivos do Servizo Municipal de Protección Civil de Cambados, así como de Urxencias Médicas de Galicia, que xa tiña constancia do accidente.