Pontevedra pediu 104 indultos o pasado ano
Por Oskar Viéitez
Logo do notable incremento vivido hai dous anos, no pasado 2013 as peticións de indulto reducíronse lixeiramente en toda a provincia.
A memoria anual da Fiscalía de Pontevedra recolle que se tramitaron "unicamente 104 expedientes de indulto cifra moi próxima á do pasado ano que foron 121".
Esta medida de graza aparentemente fundaméntase nunha valoración non xurídica da situación creada como consecuencia da sentenza, de forma que certas resolucións en certo modo difíciles de xustificar propiciaron que sexa moi solicitado o beneficio.
"Todos os penados consideran a súa situación excepcional e merecedora deste beneficio"
"Todos os penados consideran a súa situación excepcional e merecedora deste beneficio", apunta o Ministerio Público.
A Memoria recolle que o seu uso xerou "certa inquietude" e, mesmo "conflito social", nunha ocasión no curso deste ano, xa que a reivindicación propiciou un pronunciamento do Parlamento da Comunidade Autónoma nun caso onde o informe da Fiscalía era desfavorable.
O estudo dos ilícitos polos cales é solicitado o indulto é o seguinte: branqueos de capitais en temas de drogas 10, tráficos de drogas de grave dano 10, abusos sexuais 1, lesións cualificadas 1, detención ilegal 1, homicidio 1, condución alcohólica 21, temeraria 2, sen permiso 7, negativa a probas 1, con desprezo á vida 1, non pagamento pensións 4, violencia de xénero 11, homicidio imprudente 6, roubo forza 10, roubo violencia 5, furto 5, atentado 5 e quebrantamento condena.
Informáronse favorablemente tres de forma parcial, e un de forma total.
O Consello de Ministros é quen aproba esta medida de graza a instancia do titular de Xustiza. Na práctica supoñen a conmutación da condena imposta por unha pena que non leve consigo o ingreso en prisión. Unha decisión revogable se o beneficiado comete algún tipo de infracción penal.