A Xunta inviste 1,3 millóns na construción dunha nave no porto de Tragove
Por Oskar Viéitez
A Consellería do Medio Rural e do Mar inviste un total de 1,3 millóns de euros na construción dunha nova nave de descarga de moluscos no porto de Tragove, en Cambados. A titular deste departamento, Rosa Quintana, visitou este luns as obras, que teñen unha duración estimada de 10 meses.
Rosa Quintana destacou que esta nova construción suporá unha mellora das condicións de traballo dos usuarios do porto e do proceso de comercialización dos nosos produtos pesqueiros. Este espazo, engadiu, posibilitará aos usuarios dispoñer duns servizos acordes ás súas demandas.
O novo edificio consta dunha planta baixa que aporta unha superficie de uso de 840,77 metros cadrados. Este espazo, localizado nunha parcela paralela á da actual lonxa de Tragove, inclúe unha sala de poxa, dúas salas de decomisos, almacéns e cámaras de fresco e de conxelado, entre outras funcionalidades. As estancias completaranse con servizos básicos como aseos, vestiarios e despachos.
AXUDAS MAREA VERMELLA
Os bateeiros afectados polos episodios de biotoxinas de 2013 poderán acceder dende este martes a 1,5 millóns de euros en axudas. O Diario Oficial de Galicia publica este luns a orde que regula estas achegas cofinanciadas co Fondo Europeo da Pesca.
Para poder beneficiarse delas deberán acreditar que pararon a actividade durante máis de catro meses consecutivos ou que sufriron perdas de máis do 35% do volume anual de negocios da empresa no 2013.
A contía da axuda a percibir representará como máximo o 60% da perda sufrida no 2013.