Mocións e interpelacións varias monopolizarán o pleno municipal de xuño
Por Redacción
O pleno da corporación municipal deste mes de xuño servirá como escenario para o 'rifi-rafe' político. A orde do día estará monopolizada pola presentación de diferentes mocións presentadas polos respectivos grupos municipais e polas habituais interpretacións que a oposición realizará aos membros do goberno municipal. Así o adiantou o alcalde de Pontevedra, Miguel Anxo Fernández Lores, trala Xunta de Voceiros.
En total, debateranse sete mocións. Catro delas presentaraas o BNG, todas elas xa anunciadas previamente. Se trata da petición á Xunta para converter a súa vella sede en Benito Corbal nun centro cívico, mostrar o seu apoio para adiantar aos 60 anos a idade de xubilación dos axentes da Policía Local, esixir ao goberno galego a mellora da seguridade viaria en Rosalía de Castro, e a petición de indulto para Ana e Tamara.
Nesta última cuestión coincide tamén a concelleira non adscrita, María Biempica, que ademais desta moción de apoio a estas dúas traballadoras, presentará outras dúas iniciativas. Unha para que o Concello de Pontevedra reforme a coñecida como Fonte da Moureira e o ámbito das rúas Rúa do Ouro e Xan Guillerme; e outra para que se axilicen os trámites para a instalación dun skatepark nas inmediacións da Xunqueira de Alba.
Pola súa banda, o Partido Popular defenderá outras dúas mocións, unha delas sobre a falta de saneamento en diferentes zonas de Mourente e Bora; mentres que o PSdeG-PSOE presentará unha moción, da que por agora non transcendeu o seu contido.
Ademais, no pleno do 23 de xuño darase conta tamén do recente auto do Xulgado do Contencioso Administrativo número 2 de Pontevedra sobre as dedicacións exclusivas do PP e o novo réxime aprobado polo goberno municipal.