Deteñen dúas persoas como presuntas autoras de furtos na praia fluvial de Ponte Caldelas
Por Redacción
A Garda Civil detivo un veciño de Ponte Caldelas de 30 anos e unha veciña de Pontevedra, de 29, como presuntos autores de varios furtos na praia fluvial de Ponte Caldelas durante a tarde deste martes 17.
Os axentes da patrulla que vixiaba a praia detectaron estas dúas persoas como sospeitosas e, por este motivo, fíxoselles un seguimento. Nunha das rúas da localidade procederon á súa identificación e, nese momento, ambos os dous comezaron a berrar e a golpear coas mans os compoñentes da patrulla da Garda Civil. Os dous foron detidos e trasladados ás dependencias oficiais.
Durante a actuación, intervéuselles un móbil, ademais de varios efectos persoais que foron identificados polos propietarios que denunciaran a súa desaparición na praia. Imputóuselles un delito de atentado a axente da autoridade e os detidos foron postos a disposición do Xulgado de Instrución de Garda en Pontevedra.
ROUBO EN MEAÿO
A Garda Civil tamén detivo un veciño de Vigo de 34 anos como suposto autor dun delito de roubo con forza e imputou a outros dous veciños da cidade olívica de 43 e 42 anos por un delito de receptación.
Os feitos remóntanse a febreiro cando se produciu un roubo con forza nunha Corretaxe de Seguros de Meaño onde se subtraeu diñeiro en metálico, ademais de varios obxectos.
O detido e os imputados contan con antecedentes policiais e terán que comparecer ante o Xulgado de Instrución de Cambados.