Os ambulantes piden amparo á Xunta ante a "invasión de vendedores ilegais de froita"
Por Oskar Viéitez
A Asociación Galega de Ambulantes e Autónomos dirixiuse á Dirección Xeral de Comercio de la Xunta de Galicia, para denunciar o que cualifican de "invasión" de vendedores de froita que "de forma intrusa aparcan os seus vehículos nas beiras das estradas galegas, ofrecendo varios produtos, como cereixas, laranxas, sandías ou melóns".
Dende este colectivo con sede en Pontevedra, recordan á administración autonómica que as actividades económicas "nas que se utilicen ás vías públicas son susceptibles de autorización municipal". E que esta, "estará exposta á vista do público durante todo o tempo de venda".
"Nos feitos que se denuncia, estes vendedores ocultan, ou non dispoñen da preceptiva autorización municipal, nembargantes parecen estar consentidos polas diversas policías locais, do que presuntamente pode deducirse que se estea cometendo unha distracción indebida, porque o mero feito de vender na vía pública, sen expoñer publicamente a autorización municipal xa é unha infracción administrativa denunciable e se non pagan taxas de ocupación de vía pública, outra".
"Este tipo de competencia desleal lévanos directamente á ruína"
Os ambulantes sinalan que "este tipo de competencia desleal lévanos directamente á ruína".
Por iso reclaman "que se proceda con inmediatez a actuar, mesmo xudicialmente", por parte da Dirección Xeral de Comercio contra os alcaldes dos concellos, "que sendo consentidores da ocultación da autorización municipal de venda ambulante nos postos de venda, impídenlle ao público consumidor o seu primeiro dereito de saber con quen trata ou non poder distinguir entre un ambulante autorizado e un vendedor intruso".