Mariñeiros galegos solicitan axudas para levar a Noruega ante o Tribunal de Estrasburgo por negarlles as súas pensións
Por Oskar Viéitez
O alcalde de Pontevedra, Miguel Anxo Fernández Lores recibiu este mércores a unha representación da asociación Long Hope, formada de mariñeiros galegos que traballaron na frota mercante de Noruega antes de 1994. Este colectivo pediulle a colaboración do Concello nas súas reivindicacións ante o Goberno noruegués.
O presidente, Ricardo Lustres Martínez e o secretario da asociación, Mario Poceiro Carballa, explicaron que están a completar un periplo por todos os concellos da costa galega para solicitar apoios á súa petición, que pasa porque Noruega lles devolva as contribucións por impostos que pagaron mentres traballaron neste país, pero que o goberno de Oslo non os recoñece para a pensión.
A pesar de ter deducións mensuais de ata un 45% o goberno noruegués rexeita o pagamento destas pensións argumentando que estes mariñeiros non eran emigrantes nese país ao non estar fisicamente en terra, senón que estaban embarcados " aínda que se que eramos iguais á hora de pagar impostos", protestaron.
A partir de 1994, coa incorporación de Noruega ao espazo económico da Unión Europea regulouse esta situación, que xa fora recoñecida por todos os países nórdicos, aínda que fóra deste acordo quedou unha gran parte da poboación mariñeira. Segundo explicaron os representantes de Long Hope os membros deste colectivo teñen unha idade media de 80 anos, e a maior parte son viúvas de mariñeiros cunhas pensións moi precarias.
Informaron que as xestións políticas realizadas ata agora co Goberno noruegués non deron os seus froitos, mesmo chegaron a acudir ao Valedor do pobo noruegués sen que solucionase o conflito polo que agora iniciarán a vía xudicial, primeiro nos xulgados do país nórdico e, de non ter resultados favorables, en Estrasburgo.
O problema que xorde agora é o elevado custo que supón formular o caso ante o tribunal Supremo noruegués, de aproximadamente uns 300.000 euros. Como non lograron reunir esta cantidade están a solicitar axuda ás diferentes institucións galegas.
O alcalde comprometeuse a colaborar con algunha axuda, xa que a maior parte dos afectados son galegos. Están 6.000 asociados pero estiman que o número de mariñeiros con esta problemática é duns 12.000 en todo o Estado, dos cales o 90% son galegos.