Aumenta o 'galiñeiro' azul de Marín
Por Redacción
Marín terá unha segunda escola infantil da Rede A Galiña Azul con 41 prazas. O futuro centro duplicará a actual oferta de prazas da rede de escolas autonómica no Concello de Marín, onde xa está en funcionamento dende o ano 2010 outro centro de 0 a 3 anos, tamén de 41 prazas.
Este aumento do 'galiñeiro' anunciouno a Xunta de Galicia despois de que a conselleira de Traballo e Benestar, Beatriz Mato, e a alcaldesa de Marín, María Ramallo, asinaran un convenio para a construción do novo centro.
Segundo se recolle no convenio, a obra suporá un investimento de preto de 410.000 euros. Os terreos, que foron cedidos polo Concello para este proxecto, teñen unha superficie de 1.117 metros cadrados.
Tras a sinatura do convenio de construción, e unha vez que remate a redacción do proxecto da nova escola infantil, solicitarase a licencia municipal para as obras. Os traballos comezarán pola demolición nas vindeiras semanas dunha edificación existente na parcela cedida.