Ferida unha condutora en Cambados ao perder o control do seu vehículo
Por Redacción
Unha muller resultou ferida no accidente que se rexistraba pasadas as 10.00 horas desta mañá na PO-300 cando o vehículo que pilotaba a vítima se saía da vía á altura do Polígono de Sete Pías entre Oubiña e Cambados.
O vehículo saíase da calzada que se encontraba húmida debido aos chuvascos de primeiras horas da mañá e o turismo remataba nun lateral da estrada.
A ferida é Milagros Santos de 62 anos. Sufriu dor cervical e unha alteración nerviosa como consecuencia do accidente, segundo informan fontes de Protección Civil de Cambados e foi trasladada ao Hospital do Salnés.
Ata o lugar se trasladou unha dotación da Garda Civil de Tráfico e efectivos de Protección Civil de Cambados.