Sanxenxo decide prorrogar o orzamento municipal de 2013
Por Redacción
O goberno local de Sanxenxo decidiu prorrogar o orzamento municipal de 2013 no presente exercicio, segundo o anunciado polo concelleiro de Economía, Marcos Guisasola.
Esta decisión, segundo Guisasola, débese aos resultados de 2013, onde se mellorou nos indicadores financeiros.
Así os organismos autónomos pecharon o ano con números positivos comparando os ingresos e os gastos non financeiros, e logrouse amortizar débeda a longo prazo a razón dun millón de euros por ano.
A 31 de decembro a débeda a longo prazo estaba situada nun 68,01% mentres a correspondente a curto prazo supoñía un 4,18%, un total pois do 72,19% lonxe do límite legal do 110%. O obxectivo ademais, di o concelleiro, é terminar 2014 no 60,82%.
Malia iso o remanente de tesouraría das arcas públicas sanxenxinas segue a ser negativo, feito que leva a prorrogar o orzamento coa intención de "evitar tomar medidas que supoñan un incremento da carga fiscal aos veciños e veciñas que permitiría absorber a tendencia negativa do remanente de tesourería", xustificou o edil.
A prórroga do orzamento supón que o goberno local dispón de medio millón de euros para investimento e "marxe para acometer gastos voluntarios", segundo defendeu Guisasola.