Falece unha muller nun accidente de tráfico en Vilanova de Arousa
Por Redacción
Creada e actualizada
Creada e actualizada
Unha muller de 48 anos (R.P.J.) e veciña de Vilanova de Arousa falecía na tarde deste martes 13 ao sufrir un accidente de tráfico cando circulaba polo enlace da Vía Rápida entre Cambados e Vilagarcía de Arousa á altura do Concello de Vilanova. A pesar de que foi atendida polos servizos médicos, a muller perdía a vida no lugar do accidente.
A condutora, que viaxaba con outras dúas persoas, impactou frontalmente contra un taxi que circulaba polo carril contrario. O accidente producíase entorno ás 19:30 horas na estrada PO-530 e ademais da vítima mortal, un home de 78 anos que viaxaba no mesmo vehículo sufriu feridas de gravidade e foi trasladado ao Hospital do Salnés.
No sinistro víronse implicados un Ford Focus e un Opel Astra. As primeiras investigacións realizadas sobre o accidente pola Garda Civil de Tráfico determinan que a causa deste podería ser a invasión do carril contrario por parte dun Ford Focus, no que viaxaba A.M.D.I, un veciño da Illa de Arousa de 40 anos que resultou ileso.
A falecida era a condutora do Opel Astra, no que tamén circulaban o veciño de Vilanova de Arousa F.L.G.G., de 46 anos, que resultou ileso; e F.G.M., tamén veciño de Vilanova de Arousa. Trátase do home de 78 anos que resultou ferido grave e foi trasladado ao hospital.
Como consecuencia do accidente, permaneceu cortada a estrada entre as 19.30 e as 21.00 horas. Durante este tempo, Tráficohabilitou desvíos alternativos para facilitar a circulación.
Ata o lugar do accidente trasladáronse tres ambulancias asistenciais, un helicóptero do 061, persoal sanitario do PAC deVilagarcía de Arousa, ademais de axentes da Garda Civil de Tráfico e efectivos de Protección Civil de Vilanova de Arousa.