Dimite unha concelleira socialista de Vilagarcía por un comentario en Facebook sobre o asasinato de Isabel Carrasco
Por Oskar Viéitez
A concelleira do PSOE de Vilagarcía Susana Camiño confirmou a súa dimisión na madrugada deste martes despois de publicar un comentario en Facebook sobre o asasinato de Isabel Carrasco presidenta da Deputación e do PP en León.
Susana Camiño escribiu no seu perfil que " quien siembra vientos recoge tempestades". O seu comentario tivo gran repercusión nas redes sociais.
A dirección do PSdeG de Vilagarcía, nunha xuntanza de urxencia da dirección permanente, despois dos compromisos laborais dos seus membros e en permanente contacto coa dirección nacional galega do PSdeG, asegurou que as declaracións feitas por Susana Camiño, ata o día de hoxe concelleira municipal, "son absolutamente inadmisibles e non representan en ningún caso a postura do partido nin de ningún dos seus membros. Os socialistas non aceptamos ningunha explicación ou xustificación da violencia en ningunha das súas formas".
Finalmente informan que a dirección do Partido Socialista de Vilagarcía, en contacto coa dirección nacional galega do PSdeG, solicitou a Susana Camiño a súa renuncia inmediata ao acta de concelleira, acción que Camiño anunciou que levará a cabo durante o día de mañá.
Lo lamento profundamente, no pensé lo que estaba escribiendo, foi o primeiro que comentou a edil tras confirmar a súa dimisión.