O Xulgado anula a multa a un home que aparcou en carga e descarga para atender o seu pai no hospital
Por Natalia Puga
En abril de 2012 a Policía Local de Pontevedra multou un condutor que deixou o seu coche aparcado nunha zona de carga e descarga da rúa Benito Corbal mentres acudía ao Hospital Domínguez, onde acababa de ingresar o seu pai. Ao día seguinte, o enfermo faleceu e, cando lle chegou a multa, o condutor recorreu. Dous anos despois, o Xulgado obriga a retirar esa sanción ao entender que o home estacionou nunha zona non permitida para "procurar a atención debida ao seu proxenitor".
A sentenza dá a razón ao condutor porque neste caso "o interese prevalente" para el era atender ao seu pai e deixar o coche na zona máis próxima ao hospital que puidese "sen arriscarse a prexudicar coa súa tardanza calquera actuación urxente que houbese que realizar". Ademais, recolle que ao estacionar en carga e descarga non puxo en perigo a seguridade do tráfico nin causou máis prexuízo que manter ocupada unha praza durante un período de tempo puntual.
Ao respecto, sinala que "concorrendo unha situación de necesidade, se considera que non se lle debe reprochar" un aparcadoiro antirreglamentario e que aínda que o seu estacionamento é susceptible de ser cualificado como infracción "ante as circunstancias acreditadas procede a exoneración de responsabilidade".
O pai do denunciado ingresou ás 11.03 horas e a el multóuselle ás 11.45. A sentenza recolle que "non resulta difícil imaxinarse a situación vivida" polo home e que ten que considerarse que "ante o ingreso en grave estado do seu pai, resulta comprensible a acción de estacionamento no primeiro lugar que se encontra nas proximidades do centro hospitalario co fin de chegar canto antes a este e atender ás xestións propias desa situación".
A multa da Policía Local ascendía a 200 euros e a sentenza do xulgado estima o recurso interposto polo condutor, anula a sanción e déixaa sen efecto. Ademais, condénase ao Concello a pagar as costas do procedemento xudicial. O condutor xa pagara a multa, de modo que agora que a sentenza xa é firme e non cabe recurso, deberáselle devolver o importe aboado.