Os militares da Brilat aprenden as técnicas dos CSI
Por Redacción
Efectivos policiais da escola de formación do Sindicato Unificado da Policía (SUP) impartiron un curso de dactiloscopia e de recollida de evidencias para persoal militar na base Xeneral Morillo da Brilat en Figueirido.
Durante este curso, os militares que forman parte dos equipos Weapons Intelligence Teams (W.I.T.) da Brilat obtiveron coñecementos técnicos para poder desenvolver nos seus despregamentos en zonas de conflito estranxeiras fórmulas que lles axuden a solicitar indicios daqueles actos de agresión que se produzan contra a forza despregada. O curso incidiu, sobre todo, no uso de artefactos explosivos improvisados.
Dous especialistas en Policía Científica do SUP adscritos á Brigada Provincial da Policía Científica de Pontevedra foron os encargados de impartir este curso para que os militares coñezan os procedementos que se deben de adoptar para recoller evidencias e mostras que axuden a identificar os autores de ataques a través de artefactos explosivos.