Conclúe a Operación Zeus con cinco novos detidos
Por Redacción
Axentes da Policía Nacional, no marco da Operación Zeus, nun operativo desenvolvido entre o 27 e o 29 de abril, detiveron cinco persoas por tráfico de drogas, tenza ilícita de armas e falsificación de documentos.
As detencións practicadas supoñen a conclusión da investigación tutelada polo Xulgado de Instrución un de Lugo, e que comezou no pasado mes de setembro cando se tivo coñecemento dun grupo de persoas asentados na comarca do Salnés que estarían a abastecer de distintos tipos de estupefacientes a persoas residentes noutros puntos da xeografía galega.
Entre os detidos nesta última fase encóntranse o xefe da organización dentro da escala do grupo investigado, os receptores dun quilogramo de cocaína intervido o pasado 29 de marzo, e un dos transportistas do estupefaciente, así como unha colaboradora do grupo.
Concretamente, tras arduas xestións debido ás medidas de seguridade que adoptaba o investigado, na noite do pasado domingo día 27 de abril os axentes conseguiron localizar e deter un individuo de 43 anos de idade, con residencia en Vigo, que se identificou cunha carta de identidade e un permiso de conducir de Bulgaria.
A devandita persoa é considerada o xefe da organización, a persoa que surtía ao grupo da heroína que foi incautada no laboratorio desmantelado o pasado mes de marzo no lugar de Baión de Vilanova de Arousa e que mantiña contacto cos provedores do estupefaciente nos países do Leste de Europa.
Os investigadores, a través dos organismos de cooperación internacional, puideron constatar que ambos os dous documentos de Bulgaria achegados polo detido son falsos, motivo polo que se están a realizar as xestións oportunas para tratar de determinar a súa verdadeira identidade.
Unha vez localizado o piso de seguridade no que se ocultaba en Vigo, realizouse o rexistro deste, intervíndose uns 11.500 euros en efectivo así como numerosos teléfonos móbiles e documentación de interese para a investigación.
Ao día seguinte, 28 de abril, detívose en Ferrol dúas persoas que vivían nun poboado marxinal e que se consideran receptores de importantes cantidades de cocaína e heroína que os surtían os investigados residentes na bisbarra do Salnés en Pontevedra. Así mesmo o referido día detívose unha persoa en Vilagarcia de Arousa como colaboradora da citada organización.
De igual modo, o 29 de abril, detívose no Grove a outro dos investigados, acusado de realizar labores de transporte do estupefaciente así como de intermediación nas transaccións de estupefaciente. No rexistro do seu domicilio interveuse unha arma de fogo real con munición, así como varias armas prohibidas como navalla automática, pistola táser e outros.
Coas detencións desta última fase considérase conclusa a Operación Zeus, que se iniciou o pasado mes de setembro.