A rotura dunha canalización por parte de Unión Fenosa deixa a Portonovo sen abastecemento de auga
Por Redacción
A rotura dunha canalización de abastecemento xeral de auga, de 300 mm de diámetro, deixou este mércores sen servizo aos veciños da vila de Portonovo e a aquelas vivendas situadas na zona comprendida dende ese núcleo ata Montalvo.
Operarios da empresa San Martiño encontrábanse realizando uns traballos para Unión Fenosa na circunvalación que une Sanxenxo con Portonovo cando accidentalmente danaron o conduto de auga potable deixando sen subministración unha ampla área do municipio.
Espiña e Delfín, firma concesionaria do abastecemento de auga, procedeu de forma inmediata a executar os traballos necesarios para emendar a situación, comezando a restablecer progresivamente o servizo ao mediodía.