O goberno local de Marín presenta un orzamento "moi axustado"
Por Redacción
Unha vez pechado o capítulo de persoal despois das reunións mantidas cos sindicatos e xunta de persoal, o goberno local de Marín está en disposición de presentar o Presuposto municipal para este ano 2014. Un orzamento que ascende a 12.410.165 euros, lixeiramente superior ao ano 2013, concretamente un 1,5% maior.
Segundo valorou o goberno local trátase dun presuposto "moi axustado e acorde coa realidade económica deste concello, cumprindo co obxectivo de estabilidade presupostaria, así como coa regra de teito de gasto".
Un presuposto que "trata de satisfacer as principais demandas e necesidades do noso veciños, tratando de mellorar aínda máis os servizos das brigadas de obras e limpeza, e mantendo e mellorando a nosa atención de servizos sociais, centros educativos, cultura e deporte, así como o mantemento das nosas praias, o noso rural e os nosos parques e xardíns", apuntaron.
Aínda que non se van incrementar os impostos e as taxas este ano 2014, no que se corresponde aos ingresos, si se prevé un incremento dos ingresos debido ás inspeccións que se están a levar a cabo, sobre todo no que corresponde ao IBI, á regularización e actualización que se está a realizar nos subscritores dos servizos de auga, lixo e rede de sumidoiros, así como unha maior recadación que se xera pola venda de residuos a Ecoembes, que supón ao ano máis de 120.000 euros e que non se facturaron na anterior lexislatura.
En canto aos ingresos, o 54% provén de Impostos directos e indirectos do Concello, sendo o resto proveniente de Ingresos do Estado e da Comunidade Autónoma.
O gasto corrente diminúe lixeiramente en relación ao ano anterior, e supón o 47,56% do total
En canto aos gastos, no capítulo de persoal non existe incremento ningún, salvo a previsión para contratación de persoal eventual recollido no acordo adoptado no Pleno polo Plan de Emprego Municipal. Os gastos de persoal supoñen o 38,5% do presuposto.
O gasto corrente diminúe lixeiramente en relación ao ano anterior, e supón o 47,56% do total.
Os investimentos ascenden a 903.000 euros, o que supón o 7,2% do total do presuposto. Basicamente pódese dicir que as partidas consideradas neste capítulo se destinan a dar cumprimento aos distintos compromisos adquiridos por este concello con outras administracións para o cumprimento de varios convenios.
En primeiro lugar destínanse 406.000 euros ao Convenio con Aquaes para garantir o abastecemento de auga a Marín. En segundo lugar o Convenio de Saneamento con Augas de Galicia, para o que se destinan este ano 365.711 euros, e o resto de investimento destínase a cumprir coa nosa achega para a construción dunha escola infantil para Seixo.
Sitúa o nivel de endebedamento deste concello nun 24%
De novo asumiranse estes investimentos con recursos propios, sen ter que recorrer a ningunha operación de crédito para tratar así de seguir rebaixando a débeda municipal, situando o nivel de endebedamento deste concello nun 24%, tendo en conta o máximo legal permitido que é o 110%.
En canto ás subvencións, ademais das nominativas destinadas a entidades cun labor social importante como son o Comedor Benéfico, Cáritas e a Asociación Española Contra o Cancro, séguese incrementando o importe destinado a subvencións de clubs deportivos, ascendendo este ano 40.000 euros.