Dez locais de copas de Sanxenxo manipularon o sonógrafo en Semana Santa
Por Redacción
Ao longo dos dez días da campaña turística de Semana Santa a Policía Local de Sanxenxo detectou que 11 locais de ocio incumpriron o horario de peche. Sete dos incumprimentos producíronse na madrugada do Venres Santo, dous o sábado e dous o domingo.
Oito establecementos da localidade foron autorizados pola Xunta de Galicia para ampliar nestas datas o horario de apertura nunha hora, contando para iso co informe favorable do Concello de Sanxenxo e excederon a hora de peche prolongada. Tras constatar esta situación, o concelleiro de Seguridade Ciudadana, Salvador Durán, anunciou que "teremos en conta nas vindeiras tempadas turísticas no momento de emitir o informe municipal".
Segundo indicou o Concello de Sanxenxo, nas mesmas datas dez locais manipularon ou desconectaron os equipos sonógrafos-rexistradores adscritos ao sistema de control da Administración local. Outros dous negocios foron denunciados polos axentes policiais por incumprir a ordenanza municipal de protección do medio e contra a contaminación acústica no apartado relativo á limpeza.
O Concello achegou estes datos para desmentir as críticas realizadas por membros da oposición sobre a xestión municipal da campaña de Semana Santa e asegura que é "totalmente falso" que o Goberno local utilice unha dobre vara de medir no control do batifondo nocturno en Sanxenxo e en Portonovo.
Salvador Durán indicou que constaron que a última Semana Santa foi "unha das máis tranquilas dos últimos anos". De feito, a pesar do elevado número de desprazamentos rexistrados nese período, tan só se produciron once accidentes de tráfico de carácter leve. Tan só dúas persoas tiveron feridas de escasa consideración.