Frustran un intento de fuga dun preso da Lama tras saltar dous valos e un muro
Por Natalia Puga
Creada e actualizada
Creada e actualizada
Os funcionarios e os axentes da Garda Civil encargados da seguridade no centro penitenciario da Lama frustraron o domingo un intento de fuga no que un preso de orixe árabe chegou a saltar dous valos e un muro e foi interceptado xusto antes do valo exterior.
Fontes da Dirección Xeral de Institucións Penitenciarias confirmaron o intento de evasión e explicaron que os movementos do interno foron detectados dende o primeiro momento por medios mecánicos e humanos de seguridade do cárcere.
Durante o seu intento de fuga, o interno resultou ferido leve, pois erosionouse coas concertinas metálicas instaladas nos valos. Por estas lesións tivo que ser atendido na enfermaría da prisión.
O interno, de orixe marroquí, estaba no módulo de illamento por un delito de roubo con forza cando na mañá do domingo intentou escapar. Conseguiu saltar un valo interior, un muro e un dos dous valos exteriores do recinto penitenciario, pero nese momento foi interceptado polos axentes.