Descúlpase e paga unha cazadora que furtara tras encontrarse a encargada da tenda pola rúa
Por Oskar Viéitez
Dicía Charles Dickens que "nunca é tarde para o arrepentimento e a reparación", pero obviamente o célebre escritor británico non coñecía o suceso acontecido en Pontevedra o pasado 20 de marzo no que a súa reflexión parece encaixar como unha luva.
Informan dende a Comisaría Provincial que ese día, a propietaria dunha coñecida tenda de roupa de Pontevedra presentou denuncia pola subtracción de dúas cazadoras de pel.
O curioso é que pasado un tempo unha muller se presentou para que lle arranxasen á medida unha das cazadoras subtraídas manifestando que se trataba dun regalo que lle fixeran.
Os axentes da Policía Nacional localizaron a presunta autora que na Comisaría recoñeceu ter subtraído as pezas, devolveu unha das cazadoras e ademais entregou unha chaqueta de lá da que a encargada non detectara a subtracción.
Posteriormente os axentes citaron en dependencias policiais á encargada da tenda, que declarou que a presunta autora do furto, a acababa de abordar na rúa e tras pedirlle perdón, lle aboou o custo da cazadora que subtraera e que se levara xunto coas outras dúas pezas, que xa devolvera aos axentes.
A muller, de 54 anos de idade, natural de León, ten antecedentes policiais.