Acondicionan o camiño de San Roque de Cambados para estar operativo a mediados de abril
Por Redacción
Operarios do Concello de Cambados e maquinaria da Deputación encóntranse xa traballando nas obras de explanación e acondicionamento do camiño de San Roque coa previsión de que se conclúan en dúas ou tres semanas. Con estes traballos vaise proceder á apertura de gabias para canalizar as augas que, na época invernal se acumulan nesta vía situada entre a rúa Castelao e a zona Dos olmos.
A intervención levará consigo a escavación do trazado, que se encherá con pedra e posterior afirmado da calzada. Con esta actuación, está previsto que os veciños da avenida da Pastora que posúan tractores poidan utilizalos a partir desta primavera para realizar os labores agrícolas.
Segundo informa o Concello de Cambados, este vial foi a alternativa elixida para a circulación de tractores, despois da habilitación do sentido único na dirección do tráfico na avenida da Pastora.