Unha alumna do Instituto Illa de Tambo e unha científica da Misión Biolóxica, premios InvestigArte
Por Oskar Viéitez
InvestigArte preséntase como "o concurso dos científicos do Hoxe e do Mañá". Trátase dunha iniciativa dun grupo de mozos investigadores consistente nun certame de arte relacionado coa ciencia en xeral, dirixido tanto a investigadores coma a alumnos e profesores de educación secundaria, bacharelato e formación profesional, sendo o seu objectivo principal a difusión da ciencia á sociedade, dunha forma artística e visual.
A alumna de segundo de Bacharelato do IES Illa de Tambo (Marín), Laura Cruceira Valverde, gañou o Premio á mellor fotografía na categoría "Educación".
A imaxe de Laura, co título "Estudo da cicloxénese" expúxose na páxina web onde se puido ver e elixir, sendo votada de forma maioritaria, o que lle supuxo gañar o primeiro premio e formar parte dunha exposición itinerante, que estará presente en diversas cidades galegas.
Na categoría "Investigador" o premio á mellor fotografía foi para a imaxe titulada "E eu con estes pelos!!!" de Susana Boso traballadora da Misión Biolóxica de Galicia, con sede en Salcedo. Unha institución que forma parte do Consello Superior de Investigaciones Científicas.
A fotografía, tomada cun microscopio electrónico, mostra un dos aspectos máis importantes á hora de diferenciar e describir as variedades de vide (ampelografía), é a presenza de pelos nas follas, así como o tipo destes.