O Hospital do Salnés inclúe unha nova tecnoloxía que trata pólipos uterinos sen pasar polo quirófano
Por Redacción
O Hospital do Salnés incorporou unha tecnoloxía endoscópica -denominada Morcelación- que permite realizar un tratamento ambulatorio dos pólipos endometriais uterinos, causantes dunha variada sintomatoloxía en mulleres desta comarca.
O Servizo Galego de Saúde (Sergas) calcula que máis de 300 mulleres ao ano poderán beneficiarse desta innovación terapéutica na área de Pontevedra e O Salnés, evitándolles intervencións cirúrxicas que, aínda que eran ben toleradas e habitualmente non requerían ingreso, levaban consigo anestesia xeral ou epidural e unha media de 5 a 7 días de baixa laboral.
No Hospital do Salnés a Morcelación comezou a empregarse en febreiro deste ano e xa se levan realizados 15 procedementos, todos eles con resultado satisfactorio e boa aceptación polas pacientes. No eido da comunidade autónoma, os hospitais da área de Xestión Integrada de Pontevedra e O Salnés son pioneiros nesta tecnoloxía xunto co Hospital Lucus Augusti de Lugo.
A Morcelación constitúe un método seguro e efectivo para extirpar pólipos baixo visión directa. Ata agora obrigaba á realización doutras técnicas máis complexas, como a Histeroscopia con anestesia en quirófano, ou o clásico Legrado uterino que, por realizarse sen visión directa, levaba consigo a persistencia do pólipo nun 10%-50% dos casos.
A patoloxía feminina á que vai dirixida a Morcelación na área de Arousa é moi prevalente. Estímase que ata un 25% da poboación feminina adulta desta comarca pode chegar a presentar pólipos uterinos. Aínda que a maioría se comportan de xeito asintomático, poden chegar a causar problemas hemorráxicos, trastornos de fertilidade, ademais de presentar un pequeno risco de dexeneración maligna sobre todo en mulleres de maior idade, o que obriga ao seu estudo e tratamento.