Chega a primavera e regresa o inverno
Por Oskar Viéitez
A primavera astronómica comezará o xoves 20 de marzo ás 17.57 horas e rematará 92 días e 18 horas despois, o 21 de xuño, cando comezará o verán, segundo cálculos do Observatorio Astronómico Nacional do Ministerio de Fomento.
Chega a primavera pero faino cun tempo máis propio do inverno. Segundo os técnicos de MeteoGalicia, o día 20 de marzo, coincidindo coa entrada da nova estación o tempo volverase máis inestable.
Durante estes últimos quince días gozamos dun tempo seco e apacible con temperaturas calorosas e ceos despexados, pero a Axencia Estatal de Meteoroloxía prevé un empeoramento do tempo a medida que avance a semana.
O domingo 30 de marzo cambiarase a hora e comezará o horario de verán
A próxima fin de semana preséntase con nebulosidade abundante e chuvias, que poderán ser intensas. As temperaturas baixarán en todo o país. As nubes deixaranse ver a partir do martes. Debilítase o anticiclón e empezarán a coarse as nubes e nas capas medias e altas da atmosfera aire frío.
Ademais, o domingo 30 de marzo cambiarase a hora e comezará o horario de verán. Ás 02.00 horas adiantarase unha hora o reloxo e pasarán a ser as 03.00 horas, co que ese día terá unha hora menos.