Actuación de urxencia en Monte Porreiro para asegurar a subministración de auga potable á cidade
Por Oskar Viéitez
O concelleiro de Servizos Urbanos Básicos, Xaquín Moreda visitou este venres en compañía dos técnicos municipais o treito derrubado da estrada que une o barrio de Monte Porreiro coa estación de bombeo de auga potable no río Lérez.
O movemento de terras provocado pola choiva ocasionou a caída dun gran noiro sobre a senda o Lérez, e incluso, sobre o propio río. Tanto a estrada afectada como a senda permanecen pechadas para evitar posibles danos persoais.
O concelleiro explicou que "hai que facer unha obra de emerxencia para restituír o paso das sendas do Lérez, que é o moi utilizado por toda a cidadanía, e tamén para dar de acceso á estación de bombeo".
Moreda indicou que "un dos problemas graves deste desprendemento é por ese vial vai unha tubaxe de 500 cc de auga potable" que abastece á cidade. Ante esta situación, o concelleiro adiantou que hai que consolidar o terreo "para que non siga caendo".
Aínda que a actuación se fará "o máis rápido posible", Xaquín Moreda adiantou que estará uns meses pechado porque, cando menos, hai que facer un estudo xeotécnico do terreo xa que neste punto xa se fixera unha reparación anos atrás co resultado actual, e tamén será preciso facer, alomenos, un muro de contención.