Marín honra a San Miguel cunha chea de actos esta fin de semana
Por Redacción
As fitas de cores brancas, azuis e vermellas e unha escultura feita polo escultor Marcos Mariño decoran desde hai semanas a vila marinense para a celebración o 29 de setembro do gran Día de San Miguel e a súa Danza de Espadas, unha festa de interese turístico de Galicia que foi presentada pola alcaldesa, María Ramallo, a concelleira, Marián Sanmartín, e a vicepresidenta do Ateneo Santa Cecilia, Isabel Martínez Epifanio.
Pero ademais dos propios actos do domingo, xa desde o venres, Marín será un fervedoiro de actividades. O punto de encontro será a Alameda, co concerto da Banda de Musica de Marín ás 19.30 horas e o do grupo musical Blue Merrow despois, a partir das 21.30 horas.
SAN MIGHELEIRO
O sábado será a celebración do San Migheleiro, tradicional festa organizada pola hostalaría de Marín nas rúas e prazas e onde todos e todas as marinenses visten a súa camiseta de raias.
O Concello marcou unhas normas comúns para os locais que solicitaron poñer música na rúa, que consisten en conceder un máximo de catro horas por local, respectar a franxa horaria entre as 15.00 e as 17.00 horas e non rematar máis tarde das 02.00 horas.
Ademais, o Concello porá animación musical coa Charanga Noroeste, a Batukada Axé Bahía e a Charanga OT.
MILLA URBANA
O día rematará co atletismo, que sempre foi vencellado á celebración do San Miguel. A XXV Milla Urbana volverá facernos desfrutar a partir das 18.00 horas por toda a Avenida de Ourense e a Praza de España.
ACTOS DO DÍA DE SAN MIGUEL
Por outro lado, o Concello fixo pública a programación específica do propio Día de San Miguel, que será da seguinte maneira. Ás 11.00 horas terá lugar no Salón de Plenos do Concello o acto Solemne do Padroado de San Miguel, coa entrega das distincións de Cofrades de Honra, a imposición das Espadas de Ouro e Prata e o nomeamento de novos Cofrades Numerarios.
Ás 12.00 horas no Templo Novo será a Misa Solemne en honra do patrón San Miguel con saída ás 12.45 horas da Procesión e baile da Danza das Espadas, polas rúas de Marín, ata o Templo Vello.
Ás 13.45 horas terá lugar a Queima de Madamitas na Praza de España, seguida da Ofrenda floral na Praza do Reloxo. Pola tarde, ás 18.30 horas, será o Baile da Danza de Espadas, nas inmediacións da Alameda Rosalía de Castro e ás 19.00 horas haberá actuación musical no Palco da Alameda.
XVI XUNTANZA DE LABORERAS
Por último, está a XVI Xuntanza de Laboreras que organiza cada ano polo 29 de setembro a Asociación Bolymar, que reunirá a centos de personas afeccionadas a este labor artesanal e cheo de tradición na nosa comunidade autónoma. Poderá visitarse de 10.30 a 14.00 e de 16.30 a 19.00 horas.