O Grove agarda aprobar esta primavera o novo plan xeral do municipio
Por Redacción
O Concello do Grove ten a intención de proceder á aprobación inicial do novo Plan Xeral do municipio nesta primavera.
A secretaria xeral de Ordenación de Territorio e Urbanismo, Encarnación Rivas Díaz, recibiu o pasado venres ao alcalde do Grove, Miguel Ángel Pérez García, co fin de analizar o Informe Previo á Aprobación Inicial (IPAI) do Plan Xeral deste municipio pontevedrés.
O encontro serviu para consensuar criterios, consultar dúbidas e analizar con detalle a totalidade das indicacións recollidas no IPAI e no Informe do Plan de Ordenación do Litoral, ambos emitidos simultaneamente o pasado 12 de febreiro, e nos cales se solicitaba ao concello que xustificase debidamente ou clarexase con maior detalle parte das propostas presentadas.
Pola súa parte a celeridade coa que o concello analizou os dous informes e solicitou á Secretaria Xeral unha nova reunión técnica, dan boa conta do interese da administración local por axilizar a tramitación.