Cruz Vermella Pontevedra atendeu a 141 persoas sen fogar durante 2013
Por Redacción
O programa Sen Teito da Cruz Vermella atendeu durante 2013 a 141 persoas en Pontevedra, no seu segundo ano de actividade na cidade de Lérez.
Con este proxecto, cofinanciado con fondos europeos e colaboración da Consellería de Benestar e o Ministerio de Servizos Sociais e Igualdade, intenta "mellorar a calidade de vida das persoas que viven na rúa para ofrecerlles apoio dende unha perspectiva de atención integral, promovendo que o suxeito sexa o axente activo do seu propio proceso de cambio".
Segundo explica a organización, o programa chega ás persoas que o necesitan a través da súa propia sede, da rúa ou nos colectivos sociais, como comedores e albergues.
De todos os atendidos, 29 deles melloraron as súas condicións de vivenda, comezando a vivir nunha pensión ou cuartos alugados en pisos compartidos ao mellorar a súa condición económica, mentres outros se incorporaron a programas de rehabilitación e centros de atención social.
Ademais ao longo de 2013 un grupo de voluntarios realizou saídas un día por semana en horario de noite por varias zonas da cidade para achegarse á persoas sen fogar, ás que se lles entregou material para protexerse do frío como mantas, sacos de domir ou roupa térmica.
Outro dos obxectivos do programa é ofrecer actividades estables de lecer para este colectivo, o que motivou a celebración de dez talleres de diversas temáticas socioeducativas como teatro, fotografía, primeiros auxilios ou un curso de habilidades sociais.