Os pontevedreses apuran o día extra de Entroido nun multitudinario adeus a Ravachol
Por Diego Torrado & Natalia Puga
O Entroido 2014 chegou á súa fin. Tras seite días de velorio e un multitudinario enterro, Ravachol converteuse en cinzas este domingo e, con el, a festa da que é o rei indiscutible cada ano. Apagadas as chamas e recollidos os restos, os pontevedreseses xa só poden pensar o disfrace do próximo ano.
Concluíron os días de evasión, de diversión e de imaxinación e, como se comentaba este domingo na praza da Ferrería, mentres as plumas de Ravachol se desintegraban, agora chega o momento en que o multamóbil ou ollomóbil ao que rendeu homenaxe nesta edición o loro máis famoso se impoñerá na realidade cotiá á sorna coa que chegou o Luns de Entroido á botica de Don Perfecto Feijoo.
O temporal da semana pasada obrigou a aprazar o desfile de Entroido e, con el, o enterro de Ravachol. O tempo deu aos pontevedreses un día máis de festexos. O loro enterrouse o domingo en lugar do sábado e esa xornada extra de Entroido foi ben aproveitada polos pontevedreses, que durante todo o día explotaron os seus disfraces.
A cita desenvolveuse sen sorpresas. Ás 18.00 horas comezou o velorio na sala mortuoria instalada na praza da Verdura, a onde se cumpriu coa norma de acudir de loito rigoroso. Entre choros, ás 20.00 horas saíu o cortexo fúnebre acompañado do seu séquito e as comparsas 'Val do Lérez', 'Amoriños de Bora', ' Os Paparrulos', 'A Esmorga', 'Solfamidas', 'Las Flores del Carnaval', 'Vamos a Todo' e 'Os da Caña'.
Logo de percorrer as rúas San Román, Ferraría, paseo Antonio Odriozola, Soportais, Manuel Quiroga, Princesa, Isabel II, cale Real, Vide e Pasantaría, na praza da Ferrría tivo lugar a reunión infausta e, logo da celebración do aniversario, procedeuse á incineración do falecido.
Ese día extra de festa non serviu, non obstante, para enxalzar o enterro do símbolo do Entroido. O enterro de Ravachol foi multitudinario, pero menos que en anteriores edicións. Malia o bo tempo de toda a fin de semana, e ao ambiente que reinou na cidade durante todo o domingo, os desconsolados que acudiron ao velorio fóronse máis temperán ás súas casas, recolléronse sen esperar a que as plumas fosen só cincentas. Remata o Entroido e, pasada a noite, chega a rutina dun luns que non permitiu estirar máis o día.