![](/web/cache/scene/uploads/fotos/foto/5dd/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/66cdcaf1ec-20242827-consorcio-ei-bueu.jpeg)
© Xunta de Galicia
As escolas infantís públicas de Bueu e Vilaboa comezarán o curso con instalacións reformadas
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O alumnado das escolas infantís públicas de Bueu e Vilaboa arrincarán este próximo curso cunhas instalacións reformadas. Unhas obras que están a executar ambos os Concellos sufragadas polo goberno autonómico. Para supervisar estas actuacións, o xerente do Consorcio Galego de Servizos de Igualdade e Benestar, Perfecto Rodríguez, visitou estes centros acompañado de representantes das respectivas corporacións.
Na escola infantil de Bueu están a renovarse as zonas de xogo. Substitúese o revestimento por un novo de caucho que reforzará a seguridade, mellorará a estética deste espazo e introducirá xogos visuais. Ademais estanse ampliando as zonas verdes, mellorando os accesos e a circulación polo propio centro.
Na escola infantil de Vilaboa están a instalarse tarimas de vinilo en aulas e outras dependencias para igualalas ás xa existentes no patio interior. Está a renovarse a estética das fachadas e instalando un dispositivo para aumentar a presión da auga corrente. O montante económico da actuación que se realiza en Bueu supera os 36.000 euros e no caso de Vilaboa supera os 19.000 euros.
Este próximo curso 2024-25 é o terceiro que a Xunta financia integramente a matrícula en todas escolas infantís para idades de cero a tres anos. Unha medida que de acordo ás cifras do goberno galego beneficia a máis de 32.000 familias.