![](/web/cache/scene/uploads/fotos/foto/030/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/66cc6701f0-20240826-libreria-escolma-conselleiro-educacion-xunta-axuda-familias-0001.jpg)
© Cristina Saiz
"Para nós unha semana de diferenza é fundamental", o sector libreiro prefire o inicio do curso graduado por ciclos
![](/web/cache/scene/uploads/fotos/foto/107/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/66cc66f77d-20240826-libreria-escolma-conselleiro-educacion-xunta-axuda-familias-0002.jpg)
© Cristina Saiz
![](/web/cache/scene/uploads/fotos/foto/18b/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/66cc6715e2-20240826-libreria-escolma-conselleiro-educacion-xunta-axuda-familias-0003.jpg)
© Cristina Saiz
O próximo 11 de setembro comezarán o curso en Infantil e Primaria en Galicia cun total de 174.988 alumnos. A mesma data na que se incorporará o alumnado de Secundaria, Bacharelato, FP e Réxime Especial. Con motivo desa conta atrás o conselleiro de Educación, Román Rodríguez, desprazouse a Pontevedra para dar conta das axudas que a administración autonómica oferta nesta área.
Axudas que en total supoñen "cen millóns de euros para minimizar o impacto económico do inicio do curso entre as familias galegas", resumía o conselleiro engadindo que "este ano a novidade é a gratuidade da matrícula para os alumnos do sistema universario público galego. "Isto converte a Galicia na Comunidade Autónoma pioneira no feito de que un neno ou unha nena pode escolarizarse e terminar graduándose sen facer fronte a un desembolso económico".
Facendo desagregación de cifras, Rodríguez González precisaba que para a adquisión de material escolar en educación obrigatoria, este curso destínanse 9 millóns de euros "o dobre practicamente que o ano pasado". Para a adquisición de libros ofrécense cheques directos para Infantil e Educación Especial; e o fondo solidario de libros que conta actualmente con 400.000 libros. En todos estes casos priorizar as rendas máis baixas e "chegan aproximadamente a 130.000 alumnos, que supoñen o 70% das familias". Outra das vías de colaboración que sinalaba son os comedores escolares, "neste caso a Xunta leva varios anos sen repercutir o incremento dos custos ás familias", aproximadamente 70.000 alumnos que acceden a este servizo.
Suxestión dun comezo progresivo
A anécdota da visita protagonizábana desde a propia librería que o conselleiro; o director xeral, Jesús Manuel Álvarez Bértolo e o portavoz popular, Rafael Domínguez, escolleron para as súas declaracións en Pontevedra. Lourdes Rodríguez, encargada da Librería Escolma trasladoulle a queixa do sector por iniciar o curso ao mesmo tempo para os ciclos de Infantil, Primaria e Secundaria.
"Para nós unha semana de diferenza é fundamental porque nos veñen pequenos e grandes á vez e é un caos, así que se podedes volver cambialo agradecémosvolo porque da outra maneira vendiamos máis e a xente estaba mellor atendida" suxeríalle. "Quedo con ese dato, tomo nota da suxestión" respostou o conselleiro.
Profesorado
En canto ao profesorado, o conselleiro de Educación refería á mesma conclusión que para o número aulas: "este curso imos ter máis profesores que o pasado, con catro mil alumnos menos". A Consellería está "en pleno proceso de asignación de recursos. Isto non é algo arbitrario, todo faise en base a criterios técnicos e os servizos de inspección. Estamos nun nivel de persoal semellante ao do ano pasado e que en setembro se incrementará para dar respostas ás necesidades que hai en Galicia".
Escolas unitarias en Vilagarcía
Para este próximo curso a Consellería de Educación pechou as chamadas escolas unitarias de Solobeira e Guillán, en Vilagarcía, onde se rexistraron dúas e dúas matrículas. Decisión que se adoptou por non chegar ao cociente e por non haber previsión de incremento de poboación, que foi o que motivou que noutros centros semellantes de Galicia si se mantivesen.
"Neste curso en Galicia temos unha novidade: ata o momento só deixabamos aulas unitarias con seis alumnos. Este ano reducimos a cinco se temos evaludado que vaia a haber un incremento da demanda a medio prazo. Con Vilagarcía no principio do ano xa se falou para advertirlles da situación. Ninguén quere o peche de unitarias, pero non é lóxico que se non hai alumnos mantéñanse abertas". "En calquera caso, -engadía o consellleiro-, o dato que marca o curso é que en Infantil e Primaria hai 4.030 alumnos menos, pero máis aulas", en concreto dous máis.
Obras de ampliación e reforma en Pontevedra
"Pontevedra é unha cidade que levamos anos consentindo en canto a infraestruturas educativas" dicía Román Rodríguez antes de falar das obras do IES Valle Inclán e do Froebel. O primeiro está a supoñer "o maior proxecto de rehabilitación dun centro educativo en Galicia", cun investimento de máis de cinco millóns de euros. "Eu sempre digo que o Valle Inclán é unha catedral educativa cunha fortísima presenza na cidade".
En canto ás obras no colexio Froebel indicou que se están executando "en tempo, forma e prazo" e lembrou que tamén se realizaron obras de ampliación no IES Luis Seoane e no CIFP Carlos Oroza. Para completar a listaxe de infraestruturas engadiu que "se está traballando na ampliación dunha escola infantil".
Relacionadas:
-
As obras nos colexios de Sanxenxo encaran a recta final da súa posta a punto
Por Redacción |
-
A Xunta pecha as escolas infantís de Solobeira e Guillán en Vilagarcía de Arousa
Por Anxo Lourido |
-
A reforma do Valle Inclán, "moi avanzada": as aulas van estar para o 11 de setembro
Por Natalia Puga & Mónica Patxot |
-
As obras do Froebel, ao 40% e coa previsión de que o curso comece coas aulas e o patio interior rematados
Por Natalia Puga & Cristina Saiz |