A asociación fotográfica Ollares de Portonovo, novo premio 'Sanxenxo na Historia'
Por Redacción
As 'Xornadas Sanxenxo na Historia' premiarán este ano, na súa 15 edición, á asociación fotográfica Ollares de Portonovo.
O alcalde, Telmo Martín, deu a coñecer o fallo do xurado este venres durante a presentación das xornadas, que se celebrou no Real Club Náutico de Sanxenxo. Acompañáronlle a concelleira de Cultura e Eventos, Elena Torres; o presidente de Aelos, Marcelino Agís; e a secretaria do colectivo, Ángeles Marcos.
Telmo Martín destacou que dan este premio á asociación "polo seu traballo para promocionar, potenciar a fotografía como feito cultural e social que atesoura os valores históricos e identitarios do noso municipio, así como todas as actividades realizadas ao longo do ano e as colaboración cos distintos colectivos do municipio".
O rexedor tamén aproveitou a presentación para destacar o traballo realizado ao longo destes quince anos pola Asociación de Estudos Locais (Aelos) para mostrar a historia e as tradicións do municipio. Agradeceu "de forma especial" o traballo de todos estes anos de Marcelino Agís, que a partir de agora deixará de estar á fronte do colectivo.
As xornadas comezarán o 28 de agosto cunha mesa redonda sobre patrimonio histórico artístico: 'Os priorados de Sanxenxo' con Henrique Neira e 'O modernismo na bisbarra de Sanxenxo' con Rafael Fontoira. Tras os relatorios haberá un coloquio.
A segunda xornada, o día 29, abordará o tema 'Viaxeiros e aventureiros pola mar océano' cos relatorios 'Cristóbal Colón e Sanxenxo' con Eduardo Esteban Meruéndano e 'O Camiño de Santiago desde a Antártida' con José Ricardo Gato.
O día 30 as xornadas pecharán cunha mesa sobre o patrimonio fotográfico con 'Historia da Fotografía de Sanxenxo' con Victoriano Otero e 'Os fotógrafos Torres e Olimpo' con Luis Dobarro. Tras o coloquio, ás 21:30 horas, terá lugar a entrega do premio 'Sanxenxo na Historia'.
No mes de outubro recompilaranse todos estas mesas nun novo libro que será xa o oitavo da saga das xornadas de Sanxenxo na Historia.